तेह्रथुम । तेह्रथुमको पर्यटकीय क्षेत्रहरू मंगलबारे, गुफा पोखरी लगायतका क्षेत्रमा हिमपात भएको छ । मंगलबार बेलुका हिमपात भएसँगै चिसो ह्वात्तै बढेको छ ।
गतवर्ष जस्तो बाक्लो हिउँ नपरे पनि चिसो बढेको स्थानीय इन्द्र पोखरेलले बताए । उनका अनुसार हिउँ पग्लिन थालेको छ । पाँचथरको फालेलुङ गाउँपालिकाको उच्च क्षेत्रमा पनि हिमपात भएको छ । हिमपात छिमेकी राष्ट्र भारतसँग जोडिएको सिमाना लगायतका क्षेत्रमा भएको हो ।
स्थानीय डिल्ली प्रसाद केरुङका अनुसार हिमपातका कारण कुनै चौँरी गोठ वा होमस्टेमा क्षति पुगेको छैन । उनले बिहानको मौसम खुला रहेको जानकारी दिए ।
सो क्षेत्रमा हाल ३२ वटा चौँरी गोठ र झन्डै डेढ दर्जन होमस्टे रहेका छन् । हिमपातले यस क्षेत्रको सौन्दर्य थप बढाएको र पर्यटकहरूको चहलपहल बढ्ने अपेक्षा गरिएको केरुङले बताए । यसैगरी ताप्लेजुङको पाथिभरासहित उच्च क्षेत्रमा हिमपात भएको छ ।
