कोशी खेलकुद बोर्डले गर्यो तेह्रथुममा खेलकुद संरचनाको अनुगमन

विराटनगर । कोशी प्रदेश खेलकुद विकास बोर्डले तेह्रथुम जिल्ला स्थित खेलकुद संरचना तथा बोर्ड मातहत कार्यालयको अनुगमन तथा निरीक्षण गरेको छ ।कोशी प्रदेशका विभिन्न जिल्लामा रहेका खेलकुद संरचनाको अभिलेखन तयारीमा लागेको बोर्डले तेह्रथुम पुगेर अनुगम गरेको हो ।

बोर्डका सदस्य सचिव कृष्ण बस्नेतको नेतृत्वमा रहेको टोलीले जिल्लामा रहेका फुटबल मैदान र रङ्गशाला, निर्माणाधीन कभर्ड हल तथा जिल्ला खेलकुद विकास समितिको निर्माणाधीन कार्यालयको अनुगम गरेको हो ।

जिल्ला खेलकुद विकास समितिको आयोजनामा जिल्लामा रहेका सक्रिय खेलकुदकर्मीसँग अन्तरक्रिया गर्दै सदस्य सचिव बस्नेतले १० औं राष्ट्रिय खेलकुद प्रतियोगितामा कोशी प्रदेशलाई अधिकतम पदक जिताउने गरी तयारी भइरहेको बताए ।

बस्नेतले तयारीको क्रममा जिल्लाहरूमा केही समस्या देखिए बोर्डले तत्काल समाधान गर्ने प्रतिबद्धता जनाए ।