तेह्रथुमको मझौ गुफा प्रचारका लागि भलिबल प्रतियोगिता

तेह्रथुम । तेह्रथुमको फेदाप गाउँपालिका-२ हाङसुरुङमा अवस्थित मझौ गुफा ओझेलमा परेको छ । धार्मिक तथा पर्यटकीय महत्व बोकेका भएपनि प्रचार-प्रसारको अभावमा गुफा ओझेलमा परेको हो ।

गुफा जाने स्थानमा खेलमैदान छ । खेलमैदानबाट गुफा जानका लागि सिँढी पनि निर्माण गरिएको छ । तर यसको प्रचार हुन नसक्दा ओझेलमा नै परेको छ ।

गुफाको प्रचार गर्न स्थानीयले प्रत्येक वर्ष स्थानीय सरकारको सहयोगमा विभिन्न कार्यक्रम गर्दै आएका छन् । यस वर्षपनि उनीहरूले आगामी माघ १ गतेबाट ४ गतेसम्म भलिबल प्रतियोगितासँगै विभिन्न सांस्कृतिक कार्यक्रम आयोजना गरेका छन् ।

गुफामा प्रवेश सहज होस् भन्ने उद्देश्यले विजुली बत्ती जडान गरिएको छ भने गुफा नजिकै मन्दिर पनि निर्माण गरिएको छ । गुफा ७० मिटर लामो रहेको छ । गुफा भित्र बिभिन्न आकृति रहेका छन् ।

गुफालाई पर्यटकीय गन्तव्यको रूपमा विकास गर्न स्थानीय सरकारले विभिन्न काम गर्दै आएको फेदाप गाउँपालिकाका अध्यक्ष केशवप्रसाद भेटवालले बताए । यस गाउँपालिका भित्र अन्य पर्यटकीय गन्तव्य पनि प्रचार-प्रसारको अभावमा ओझेलमा परेका छन् ।