तेह्रथुममा ट्याक्टर दुर्घटना हुँदा एक जनाको मृत्यु

विराटनगर । तेह्रथुमको आठराई गाउँपालिका-३ हवाकु पञ्चमी टोलस्थित भित्री सडक खण्डमा ट्याक्टर दुर्घटना हुँदा एक जनाको मृत्यु भएको छ । दुर्घटनामा ट्याक्टर चालक बारा घर भएका ३२ वर्षीय किशान परियारको मृत्यु भएको हो ।

प्रहरीका अनुसार गम्भीर घाइते भएका उनलाई उपचारका लागि गणेशमान सिंह अस्पताल लगिएकोमा उपचारका क्रममा मृत्यु भएको हो । सिमेन्ट बोकेको ना ७ त ६३४९ नम्बरको ट्याक्टर आफैँ अनियन्त्रित सडकबाट करिब तीन सय मिटर तल खसेको थियो ।

तीब्र गतिका कारण ट्याक्टर दुर्घटना भएको प्रहरीको प्रारम्भिक अनुसन्धानबाट खुलेको छ । ट्याक्टर घटनास्थलमै रहेको र दुर्घटनाका सम्बन्धमा आवश्यक अनुसन्धान भइरहेको प्रहरीले जनाएको छ ।