सुजन ढकाल 
तेह्रथुम । कालो सुन अर्थात अलैँचीले राम्रो भाउ पाएपछि कृषकमा खुसी थपिएको छ । यो वर्ष १२ वर्षयताकै उच्च मूल्यमा अलैँची कारोबार भइरहेको छ । जसले कृषकमा थप जाँगर थपिदिएको छ ।
तेह्रथुममा उच्च गुणस्तरीय अलैँची प्रतिमन एक लाख १० हजार सम्ममा बिक्री भइरहेको छ । अलैँचीको पुराना बगान मासेर नयाँ बगान विस्तार गरिरहेका किसानलाई यसले थप उर्जा दिएको फेदाप गाउँपालिक-२ का कृषक कृष्ण दुलालले बताए ।
Advertisement
‘एक पटक बिरुवा लगाएर छाडिदिने होइन । पटक-पटक मलजल, गोडमेल र बगानको सरसफाइ गर्नु आवश्यक छ ।’, दुलालले भने, ‘जाँगर चलाउँदा अब पैसाकै लागि विदेशिनुपर्ने अवस्था छैन भन्ने प्रमाणित अलैँची खेतीले पुष्टि गरेको छ ।’
यसवर्ष अलैँचीले राम्रो भाउ पाएको भन्दै उनले सँधै यस्तै भए युवाहरूले गाउँमै बसेर उद्यम गर्ने वातावरण बन्ने बताए । दुलालले २२ रोपनी जमिनमा अलैँची लगाएका छन् । यसपटक गत वर्षभन्दा बढी अलैँची फलेको उनले सुनाए ।
पूर्वी पहाडमा नगद आर्जनको राम्रो स्रोत बनेको अलैँचीको मूल्य करिब एक महिनायता प्रतिमन एक लाख १० हजार रुपैयाँमा आएर स्थिर रहेको उनको भनाइ छ । उनका अनुसार अहिले गाउँबाट करिब ७० प्रतिशत अलैँची बजार गइसकेको छ ।
जिल्लाका म्याङलुङ बजार, आठराई, औँशी बजार, ओयाकजुङ, मोराहाङलगायतका क्षेत्रमा अलैँचीको कारोबार भइरहेको छ । जिल्लामा वर्षेनी करिब तीन अर्ब हाराहारीको अलैँची कारोबार हुने गरेको छ ।
२०७९ सालमा तेह्रथुममा अलैँची प्रतिमन ३२ हजार रुपैयाँमा कारोबार भएको थियो । २०८० सालमा ६० देखि ९० हजार पुगेको अलैँचीको मूल्य अहिले एक लाख १० हजार पुगेको हो । १० वर्षअघि पनि अलैँचीको मूल्य प्रतिमन लाख रुपैयाँ नाघेको थियो ।
मूल्य उच्च भएसँगै अहिले किसानले अलैँची खेती विस्तारका लागि बारी तयार गर्ने, बिरुवा उत्पादनका लागि ब्याड राख्नेजस्ता काम थालेका छन् ।
