पाँचथर र तेह्रथुम जोड्ने तमोर नदीमाथिको पुल ६ वर्षदेखि अलपत्र

तेह्रथुम । पाँचथर र तेह्रथुमलाई जोड्ने मोटरेवल पुल ६ वर्षदेखि अलपत्र छ । लुम्वुघाटमा तमोर नदीमाथि निर्माणाधीन पुलको नौ वर्षअघि ठेक्का लागेको थियो । सम्झौता अनुसार तीन वर्षमा बनिसक्नुपर्ने पुल अहिलेसम्म अलपत्र अवस्थामा छ ।

ठेकेदारको लापरबाहीका कारण समयमा निर्माण सम्पन्न नभएको भन्दै स्थानीय आक्रोशित हुन थालेका छन् । निर्माण कम्पनीले पुल अलपत्र अवस्थामा छाडेपछि जिल्लाबासीहरूले अख्तियार दुरुपयोग अनुसन्धान आयोगमा समेत उजुरी दर्ता गराएका थिए ।

निर्माण सम्पन्न भएको काममा समेत ठेकेदारले कमसल सामग्री प्रयोग गरेको स्थानीयको आरोप छ । दुवै जिल्लाका जनप्रतिनिधिले पुलको स्थलगत निरीक्षण गरी गुणस्तरीय सामान प्रयोग गर्न ठेकेदारलाई पटक-पटक निर्देशन दिएका थिए ।

स्थलगत निरीक्षण गरेपछि पुलमा प्रयोग गरिएका सामग्री कमसल फेला परेको म्याङलुङ नगरपालिकाका प्रमुख सञ्जय कुमार तुम्बाहाङफेले बताए । निर्माण कम्पनीले पुलमा कमसल सामग्रीको प्रयोग गरेको जनगुनासो आएपछि दुवै जिल्लाका जनप्रतिनिधिले फरक-फरक समयमा पुलको स्थलगत अनुगमन गरेका थिए ।

विभिन्न बहाना देखाउँदै पुल निर्माणमा ढिलाई गर्दै आएको स्वच्छन्द निर्माण सेवासँग जनप्रतिनिधिले पुल निर्माणमा प्रयोग गरिएका सामग्रीको ल्याब टेष्ट रिपोर्ट मगाएका थिए । उनीहरूले निर्माण कम्पनीलाई समयमै काम सम्पन्न गर्न दबाब समेत दिँदै आएका थिए ।

त्यसयता ठेकेदारले काम नै रोकेर बसेको छ । पाँचथरबाट प्रतिनिधिसभा सदस्यमा निर्वाचित बसन्तकुमार नेम्वाङ समेतको टोलीले पुल निर्माणस्थलमै पुगेर पटक-पटक अनुगमन गरेको थियो । पछि उनै नेम्वाङ भौतिक पूर्वाधार तथा यातायात मन्त्री समेत बने ।

निर्धारित समयमा पुल निर्माण सम्पन्न नहुँदा दुई जिल्लाबासीले दुःख बेहोर्न बाध्य हुनुपरेको पाँचथरको कुम्मायक गाउँपालिकाका निवर्तमान अध्यक्ष जयबहादुर चेम्जोङले बताए ।

सडक डिभिजन कार्यालय धनकुटाले स्वच्छन्द निर्माण सेवा काठमाडौंलाई तीन वर्षमा काम सक्नेगरी नौ वर्षअघि ठेक्का लगाएको थियो । तर अहिलेसम्म ४० प्रतिशत मात्रै काम सम्पन्न भएको सडक डिभिजन कार्यालय धनकुटाका प्रमुख कैलाश कुमार देवले बताए ।