भीमनारायण गोल्डकपको फाईनल खेल सर्यो, यस्तो छ कारण

धनकुटा, ३० भदौ । धनकुटामा जारी १३ औं शहीद भीमनारायण अन्तर्राष्ट्रिय आमन्त्रण गोल्डकप फुटवल प्रतियोगिताको फाईनल खेलको मिति परिवर्तन भएको छ । शुक्रवार साँझ बसेको प्रतियोगिता आयोजक समितिको बैठकले शनिवार हुँने भनिएको फाईनल खेलको मिति परिवर्तन गरेर फाईनल खेल आईतवार खेलाउँने निर्णय गरेको हो ।

शुक्रवारको सेमिफाईनल खेलमा साविक बिजेता फ्यान्स क्लव बिआरसी भुटानलाई पराजित गर्दै फाईनल प्रवेश गरेको विर्ता यूनाईटेड झापाको खेल जुधेपछि फाईनल खेल सारिएको हो । मोरङको लक्ष्मीमार्गमा जारी प्रथम बुद्ध एयर लक्ष्मीमार्ग गोल्डकपमा पनि विर्ता यूनाईडेट झापा फाईनल पुगेको छ ।

भीमनारायण गोल्डकप र लक्ष्मीमार्ग गोल्डकपको फाईनल खेल पनि शनिवारनै परेको हुँनाले झापाले दुवै गोल्डकपमा एकैदिन खेल्न सम्भव नहुँदा फाईनल खेल एक दिन पछि सारिएको प्रतियोगिता आयोजक समिति संयोजक सम्भु प्रधानले संगालोखबरलाई जानकारी दिएका छन ।

‘दुईवटै गोल्डकपको फाईनल खेल एकै दिन र फाईनल खेल्ने टिम पनि एउटै भएपछि समस्या सृजना भयो ।’ संयोजक प्रधानले संगालोकर्मीसँग भने ‘लक्ष्मीमार्ग गोल्डकपमा एकदिन ग्याभ गरिसकेको रहेछ, हामीले रेगुलर खेलाईरहेकाले अव एकदिन ग्याभ गरेर आईतवार फाईनल खेलाउँने निर्णय गरेका छौ ।’

अव विर्ता यूनाईटेडले शनिवार बुद्ध एयर लक्ष्मीमार्ग गोल्डकपको उपाधीका लागि जिविरवर क्लव मंगलबारेसँग फाईनल खेल खेल्नेछ । त्यसपश्चात आईतवार भीमनारायण गोल्डकपको उपाधीका लागि विर्ता यूनाईटेडले काठमाण्डौंको ब्वाईज यूनियनको सामना गर्नेछ ।