धनकुटामा स्थानीय तह निर्वाचनका लागि कांग्रेसले सात नेतालाई दियो संयोजनको जिम्मेवारी

धनकुटा । आगामी बैशाखमा हुँन लागेको स्थानीय तह निर्वाचनलाई लक्षित गर्दै नेपाली कांग्रेस धनकुटाले जिल्लाका सात वटै पालिकामा एक/एक जना नेतालाई चुनावी संयोजनको जिम्मेवारी दिएको छ । कांग्रेस जिल्ला कमिटीको आज बसेको दोस्रो पूर्ण बैठकले स्थानीय तह निर्वाचनमा चुनावी गतिविधि संयोजनका लागि जिल्ला पार्टीका नेताहरुलाई जिम्मेवारी दिने निर्णय गरेको हो ।

बैठकले धनकुटा नगरपालिकामा पार्टीका जिल्ला सचिब विजयसन्तोषी राई, पाख्रीवास नगरपालिकामा जिल्ला उप–सभापति सुनिलकुमार डंगोल र महालक्ष्मी नगरपालिकामा जिल्ला उप–सभापति निर्मलकुमार ओझालाई संयोजनको जिम्मेवारी दिएको छ । यस्तै साँगुरीगढी गाउँपालिकामा जिल्ला सचिब जयन्द्र घिसिङ, चौविसे गाउँपालिकामा जिल्ला सह–सचिव गिरीजाप्रसाद दाहाल, छथर जोरपाटी गाउँपालिकामा जिल्ला सह–सचिब रोशन श्रेष्ठ र सहिदभूमि गाउँपालिकामा जिल्ला पार्टी प्रचार विभाग प्रमुख खगेन्द्र प्रसाद घिमिरेलाई संयोजन गर्ने जिम्मेवारी दिइएको छ ।

बैठकले महासमिति निर्वाचन गर्न रमेश श्रेष्ठको संयोजकत्वमा निर्वाचन समिति पनि गठन गरेको छ । समितिको सदस्यमा भोला भट्टराई र हिमा चेम्जोङलाई चयन गरिएको छ । बैठकले २२ जनालाई आमन्त्रित सदस्य मनोनित गरेको छ भने २१ जनाको सल्लाहकार समिति चयन गरिएको पार्टी प्रचार विभाग प्रमुख घिमिरेले जानकारी दिए । उनका अनुसार बैठकले जिल्ला पार्टीको ४९ वटा विभाग पनि गठन गरेको छ ।

कांग्रेस एक ढिक्का छ, अब चुनावमा लागौं: सभापती राई

नेपाली कांग्रेस धनकुटाका सभापती दिनेश राईले पार्टीको १४ औं महाधिवेशन अन्र्तगत भएका अधिवेशनहरुमा वेग्ला–वेग्लै समूह बनाएर प्रतिष्पर्धा भएतापनि अधिवेशन सकिएपछि कांग्रेस एक ढिक्का भएको दावी गरेका छन् । कांग्रेस जिल्ला कार्यसमितीको बैठकमा बोल्दै सभापति राईले पार्टीको आन्तरिक लोकतन्त्र बलियो बनाउन र नयाँ साथीहरुलाई जिम्मेवारी दिनका लागि हुने यस्ता प्रतिष्पर्धामा कसैको जित वा हार नहुने बताए ।

निर्वाचनमा सफल हुन नसकेका साथीहरुसँग पनि आफुले सम्पर्क र भेटघाट गरिरहेको भन्दै उनले सबैको चाहना कांग्रेसलाई बलियो बनाउनु भएको बताए । कांग्रेस जिल्ला नेतृत्वले सबै नेता कार्यकर्तालाई समान व्यवहार गर्ने भएकाले कोही पनि निरास नभई पार्टीलाई वलियो बनाउँनेतर्फ लाग्न राईले सुझाव दिए ।

अधिवेशनमा बिजयी भएका तथा पराजित भएका सबैलाई समेटेर पार्टी अघि बढ्ने भएकाले अब सबै नेता कार्यकर्तालाई चुनावमा केन्द्रित हुँन उनले निर्देशन दिएका छन् ।