विराटनगर । कोशी प्रदेश प्रहरी प्रमुख फेरिएका छन् । तेह्रथुमको मोराहाङ घर भएका डीआइजी चन्द्रकुबेर खापुङले बुधबार कोशी प्रदेश प्रहरी कार्यालय प्रमुखको जिम्मेवारी सम्हालेका हुन् ।
Advertisement
विराटनगरस्थित कोशी प्रदेश प्रहरी कार्यालयका डीआईजी राजेशनाथ बाँस्तोलाको प्रहरी प्रधान कार्यालय अन्वेषण, योजना तथा विकास निर्देशनालयमा सरुवा भएको छ । प्रहरी प्रधान कार्यालयले बाँस्तोलाको ठाउँमा खापुङलाई पठाएको हो ।
खापुङ, अख्तियार दुरुपयोग अनुसन्धान आयोग प्रहरी महाशाखा टङ्गालमा कार्यरत थिए । कोशी प्रदेश प्रमुख पर्शुराम खापुङका भतिजासमेत रहेका उनी आफ्नै प्रदेशको प्रहरी प्रमुख बनेर आएका हुन् । प्रहरी निरीक्षक पदबाट प्रहरी सेवामा प्रवेश गरेका उनी सेवामा प्रवेश लगत्तै मोरङमा लामो समय बसेका थिए । उनले जिल्ला प्रहरी कार्यालय, वडा प्रहरी, इलाका प्रहरी कार्यालय बेलबारी र उर्लावारीमा बसेर काम गरिसकेका छन् ।
कोशी प्रदेश प्रहरी प्रमुखको पदभार ग्रहण गरेपछि उनले प्रहरी आचरण र व्यवहारमा सुधार ल्याई कानूनको परिधिमा रहेर आ–आफ्नो पदीय जिम्मेवारी वहन गर्न प्रहरी कर्मचारीहरूलाई निर्देशन दिएका छन् ।
समाजमा शान्तिसुरक्षा कायम राख्न अहोरात्र खटिई जनचाहना बमोजिमको प्रहरी सेवा प्रदान गर्न उनले निर्देशन दिएका छन् ।
