धरानमा खानेपानी महसुल वृद्धिविरूद्ध प्रदर्शन

सुनसरी । धरान खानेपानी व्यवस्थापन बोर्डले अत्यधिक रुपमा महसुल र अन्य शुल्क वृद्धि गरेको भन्दै आज सर्वदलीय संघर्ष समितिले धरानमा विरोध प्रदर्शन गरेको छ ।

खानेपानीको जडान शुल्क र महसुल बढाइएपछि राजनीतिक दलहरूले विरोध गर्दै आएका थिए । निर्धारित कार्यक्रमअनुसार उनीहरुले आज धरान नगरमा प्रदर्शन गरेका हुन् । प्रदर्शनका क्रममा राजनीतिक दलका नेता, कार्यकर्ता र सर्वसाधारणको वृहत् सहभागिता थियो ।

धरानमा क्रियाशील १० राजनैतिक दलले खानेपानीको शुल्क र महसुल पुरानै कायम गर्न माग राख्दै यसअघि धरान खानेपानी व्यवस्थापन बोर्डमा ज्ञापनपत्र बुझाएका थिए । त्यसको सुनुवाइ नभएपछि दलहरूले चरणबद्ध आन्दोलन गर्दै आएका छन् ।

चालु आर्थिक वर्षदेखि धरानमा नयाँ धारा जडान गर्दा लाग्ने शुल्कमा ५ हजार रुपैयाँ बृद्धि गरिएको छ । यसअघि आधा इन्चको पाइपमा धारा जडान गर्दा १५ हजार रुपैयाँ लाग्ने गरेको थियो । यस्तै, नयाँ धारा जडान शुल्क २५ हजार तोकेको छ । यसअघि १० हजार रुपैयाँ थियो । यस्तै, बोर्डले १ इन्चको पाइपको धारा जडान ५० हजार शुल्क तोकेको छ । यसअघि १५ हजार रुपैयाँ थियो ।

खानेपानी व्यवस्थापन बोर्ड धरान उपमहानगर अन्तर्गत छ । खानेपानी बोर्ड सञ्चालनमा समस्या भएको भन्दै बोर्डका अध्यक्ष तथा मेयर हर्क साम्पाङले खानेपानी जडान, नामसारी, मर्मत तथा परीक्षणमा लाग्ने शुल्क तथा खानेपानीको महसुलमा ९ हजार ९ सय प्रतिशतसम्म वृद्धि गरेपछि राजनीतिक दलहरू विरोधमा उत्रिएका हुन् । जडान शुल्क र महसुल वृद्धि अवैज्ञानिक भएको नेकपा एमाले धरानका अध्यक्ष हर्कजङ्ग एभेङ्गको भनाइ छ ।