धनकुटामा बालिकामाथि यौन शोषणको आरोप लागेका चारै जना पुर्पक्षका लागि थुनामा

धनकुटा । धनकुटाकी दलित बालिकामाथि यौन शोषणको आरोप लागेका चार जनालाई जिल्ला अदालत धनकुटाले पुर्पक्षका लागि थुनामा राख्न आदेश दिएको छ । जिल्ला अदालतका न्यायाधीश फणिन्द्रप्रसाद पराजुलीको एकल इजलासले अभियुक्तहरुलाई पुर्पक्षका लागि थुनामा राख्न आदेश दिएको हो ।

धनकुटा नगरपालिकाकी १४ बर्षीया बालिकालाई पटक–पटक यौन शोषण गरेको किटानी जाहेरी परेपछि धनकुटा–६ आत्माराका शिक्षक मदन अधिकारी, गौरी अत्री, भीमनारायण चौकका देवेन्द्र श्रेष्ठ र कचिडेका भक्तबहादुर मगरलाई पक्राउ गरी मुद्दा दायर गरिएको थियो । १८ बर्ष मुनिका बालिकालाई सहमतिमै शारीरिक सम्पर्क राखेपनि जबरजस्ती करणी ठहरिने कानुनी व्यवस्था भएकाले प्रहरीले उनीहरुबिरुद्ध जबरजस्ती करणी कसुरमा मुद्दा चलाएको थियो ।

जिल्ला अदालतमा भएको थुनछेक बहसपछि उदालतले उनीहरुलाई पुर्पक्षका लागि थुनामा राख्न आदेश दिएको हो । जिल्ला प्रहरी कार्यालयको हिरासतमा रहेका उनीहरुलाई अदालतको आदेशसँगै जिल्ला कारागार पठाईएको धनकुटाका प्रहरी प्रवक्ता डिएसपी ध्रुवकुमार श्रेष्ठले जानकारी दिए । अब अदालतको फैसलापछि यो बिषयको किनारा लाग्नेछ । अदालतले दोषी ठहर गरेमा कैद सजाय हुनेछ भने निर्दोष ठहरिएमा थुनामुक्त हुनेछन् ।

उनीहरुले ती बालिकालाई ललाईफकाई महिनौं अघिदेखि पटक–पटक यौन शोषण गरेको आरोप छ । यौन शोषणमा परेकी बालिकामा गर्भ रहेर पेट बढ्दै गएपछि सोधपुछ गर्ने क्रममा घटनाको रहस्य खुलेको थियो । अहिले १४ बर्षीया ती बालिकाको पेटमा ६ महिनाको गर्भ छ ।

यो पनि हेर्नुहोस्…