चिसो चुलो, चिसै ओछ्यान... (फोटो फिचर)

विराटनगर । भारी वर्षाका कारण विराटनगरका धेरै स्थान डुबानमा परेका छन् । डुबानका कारण धेरै घरपरिवार समस्यामा परेका छन् । समयमै नाला सफा नगर्दा घरभित्र पानी पसेको स्थानीय बताउँछन् । विराटनगर–६ रामपुरको धुदुवा पैनी सफा नहुँदा बस्तीमा बाढी पसेको उनीहरुको भनाइ छ ।

विराटनगर–६ की मीनादेवी पासवान घरमा पानी पसेका कारण बस्न समस्या भएको बताउँछिन् । वडा कार्यालयले नाला सफा गर्न चासो नदिँदा घरमा पानी पसेको उनको भनाइ छ ।

‘बारम्बार पानी निकासको बाटो बनाइदिनु भनेर वडा कार्यालय पनि धायौँ’, सोही स्थानकी गौरी दास भन्छिन्, ‘तर पनि सुनुवाइ भएन । भल पसेर भान्सामा चुलोदेखि सुत्ने ओछ्यानसम्मै हिलाम्य भएको छ ।’

सोही स्थानकी अरुलियादेवी पासवानको घरमा पानी पस्दा अन्नपात सबै भिजेको छ । घरमा जलमग्न पानी हुँदा बस्ने ठाउँ समेत नभएको उनले सुनाइन् ।

विराटनगर–२ सिंघिया खोला छेउका स्थानीय बाढी बढेसँगै अनिँदो बस्ने गरेको बताउँछन् । खोलामा तटबन्ध निर्माण नहुँदा हरेक वर्ष डुबानको समस्या भोग्न बाध्य भएको उनीहरूको भनाइ छ ।