संगालोखबर 
विराटनगर । विराटनगरबाट सशस्त्र प्रहरीले २० किलो गाँजासहित एक युवकलाई नियन्त्रणमा लिएको छ ।
सशस्त्र प्रहरी बल नेपाल नम्बर ३ गण हेडक्वार्टर कङ्कालिनी मोरङबाट खटिएको मोबाइल गस्ती टोलीले आज विराटनगर-७ भृकुटी चोक नजिकबाट एक जनालाई पक्राउ गरेको हो ।
विशेष सूचनाका आधारमा खटिएको सशस्त्रको टोलीले धनकुटाको सहिदभूमि गाउँपालिका-५ का १९ वर्षीय अजित राईलाई पक्राउ गरेको छ ।
इटहरीबाट आएको बा ९६ प ४५२५ नम्बरको मोटरसाइकललाई चेकजाँच गर्ने क्रममा सशस्त्रले दुई वटा कालो झोलामा राखिएको अवस्थामा २० किलो गाँजा बरामद गरेको हो ।
प्रहरीका अनुसार अजित गाँजा राखिएको झोला समातेर मोटरसाइकल पछाडि सवार थिए । मोटरसाइकल चालक फरार रहेकाले उनको खोजी तीव्र पारिएको प्रहरीको भनाइ छ ।
सशस्त्र प्रहरीले बरामद गाँजा, मोटरसाइकल र पक्राउ परेका राईलाई जिल्ला प्रहरी कार्यालय मोरङमा बुझाएको छ । घटनाका सम्बन्धमा थप अनुसन्धान भइरहेको प्रहरीले जनाएको छ ।
