संगालोखबर 
विराटनगर । मोरङको कटहरी गाउँपालिका-२ स्थित जीवन विकास सामुदायिक अस्पताल तथा टेक्निकल एजुकेशन फाउन्डेसन र हेल्थ तथा हाइजीन प्रोडक्ट्स प्रा.लि.बीच स्वास्थ्य सेवामा छुट प्रदान गर्नेसम्बन्धी सम्झौता भएको छ ।
सम्झौताअनुसार हेल्थ तथा हाइजीन प्रोडक्ट्समा कार्यरत कर्मचारी, उनीहरूका परिवारका सदस्य, संस्थापक तथा सम्बन्धित व्यक्तिहरूले जीवन विकास अस्पतालबाट प्रवाह हुने विभिन्न स्वास्थ्य सेवामा १० देखि ५० प्रतिशतसम्म छुट प्राप्त गर्नेछन् ।
सम्झौता पत्रमा अस्पतालका तर्फबाट प्रशासन प्रमुख अनिता कुमारी गच्छदार, मार्केटिङ अफिसर कार्तिक चन्द मण्डल र आभाष सिंह तथा कम्पनीका तर्फबाट जनरल प्रबन्धकले संयुक्त रूपमा हस्ताक्षर गरेका हुन् ।
सम्झौताअनुसार कम्पनीका कर्मचारी तथा सम्बन्धित व्यक्तिहरूले चिकित्सकीय परामर्श तथा बहिरङ्ग सेवा तथा निदानात्मक, इमेजिङ तथा प्रयोगशाला परीक्षण छुट पाउने छन् ।
यस्तै आकस्मिक सेवा, शय्या सुविधा र भर्ना सेवा, शल्यक्रिया तथा अपरेशन थिएटर प्रयोग, विशेषीकृत सघन उपचार सेवा र अस्पतालमा उपलब्ध तथा चिकित्सकीय रूपमा आवश्यक अन्य सम्पूर्ण स्वास्थ्य सेवाहरूमा छुट हुने सहमति भएको छ ।
