संगालोखबर 
धनकुटा । धनकुटामा आज बिहान करिब ११ः१५ बजे भएको बस दुर्घटनामा तीन जना घाइते भएका छन् । साँगुरीगढी गाउँपालिका-६ स्थित चारखोले गोलाइमा भएको दुर्घटनाका घाइतेलाई उपचारका लागि बीपी कोइराला स्वास्थ्य विज्ञान प्रतिष्ठान धरान पठाइएको छ ।
दुर्घटनामा तेह्रथुमको छथर गाँउपालिका-१ की अन्दाजी ११ वर्षीया नुमा लिम्बु, छथर गाँउपालिका-४ का अन्दाजी ६९ वर्षीय कविराज थापा र सोही स्थानकी अन्दाजी ५६ वर्षीया शुकमाया लिम्बु घाइते भएका छन् ।
उनीहरूको अवस्था सामान्य रहेको धनकुटाका प्रहरी प्रवक्ता डीएसपी हेमन्त भण्डारीले संगालोखबरलाई जानकारी दिए ।
धरानबाट तेह्रथुमतर्फ जाँदै गरेको को १ ख ५१०५ नम्बरको यात्रु बाहक बस अनियन्त्रित भएर सडक छेउमा दुर्घटना भएको प्रहरीले जनाएको छ । प्रहरीले बस चालकलाई नियन्त्रणमा लिएको छ ।
