कप्तानगञ्ज पुग्यो छानबिन समिति

विराटनगर । सुनसरीको देवानगन्ज गाउँपालिका-३ स्थित कप्तानगञ्जमा सरकारद्वारा गठित छानबिन समिति पुगेको छ ।

समितिले मृतकका परिवार, घाइते, स्थानीय बासिन्दा, जनप्रतिनिधि तथा सरोकारवालासँग छुट्टाछुट्टै भेटघाट गरी घटनाको विस्तृत विवरण संकलन गरिरहेको हो ।

आइतबार राति दुई समूहबीच भएको विवाद नियन्त्रणका क्रममा प्रहरीले चलाएको गोली लागेर एक जनाको मृत्यु भएको थियो भने ९ जना घाइते भएका छन् ।

घटनाको विरोधमा प्रदर्शन उग्र भएपछि गृह मन्त्रालयले सोमबार छानबिन गृहमन्त्रालयका सहसचिव भुपेन्द्र थापाको संयोजकत्वमा ५ सदस्यीय समिति गठन गरेको थियो । सोमबार नै विराटनगर आएको समितिले घट्नाका घाइतेलाई भेटेर बयान लिएको छ ।