तमोर नदीमा हाम फाल्न हिँडेका सुनसरीका पुरुषको सकुशल उद्धार

धनकुटा। पारिवारिक विवादका कारण धनकुटाको तमोर नदीमा हाम फालेर आत्महत्या गर्न हिँडेका सुनसरीका एक पुरुषलाई प्रहरीले सकुशल उद्धार गरेको छ।

सुनसरीको धरान उपमहानगरपालिका-११ बस्ने ४३ वर्षीय सोमबहादुर तामाङलाई प्रहरीले सकुशल उद्धार गरेकाे हाे ।

उनले को १ ह ६५८४ नम्बरको अटो रिक्सा लिएर म तमोर नदीमा हाम फालेर मर्न जाँदैछु भनी घरपरिवारलाई फोनमार्फत जानकारी गराएका थिए।

सो जानकारी आज अपराह्न ४:३० बजे इलाका प्रहरी कार्यालय धरानमार्फत जिल्ला प्रहरी कार्यालय धनकुटालाई प्राप्त भयाे । सूचना पाउनासाथ खटिएको प्रहरी टोलीले उनलाई धनकुटा नगरपालिका-९ स्थित तमोर नदीको पुलमा सकुशल फेला पारेको हो।

प्रहरीले उनलाई गुडिरहेको अटो सहित सुरक्षित रूपमा नियन्त्रणमा लिएर प्रहरी चौकी मूलघाटमा ल्याएको छ। उनका आफन्तजनलाई जानकारी गराइसकिएको प्रहरीले जनाएकाे छ । प्रहरीले यस सम्बन्धमा थप अनुसन्धान गरिरहेको छ।