किर्ते दस्तखत गरी २५ लाख बढी रकम निकासा, तेह्रथुम खेलकुद विकास समितिका पूर्वअध्यक्ष पक्राउ

तेह्रथुम । जिल्ला खेलकुद विकास समिति तेह्रथुमको बैंक खाताबाट किर्ते दस्तखत गरी लाखौँ रकम हिनामिना गरेको आरोपमा समितिका पूर्व अध्यक्ष राजेन्द्र बराल पक्राउ परेका छन् ।

जिल्ला खेलकुद विकास समितिका सदस्य सचिवको नक्कली दस्तखत प्रयोग गरी बैंक खाताबाट रकम गैरकानुनी रूपमा निकासा गरेको आरोपमा प्रहरीले उनलाई नियन्त्रणमा लिएको हो ।

बरालले नेपाल बैंक लिमिटेडमा रहेको खाताबाट २५ लाख ७९ हजार ६ सय ९६ रुपैयाँ किर्ते दस्तखत मार्फत अन्य खातामा ट्रान्सफर गरी निकासा गरेको पाइएको जिल्ला प्रहरी कार्यालय तेह्रथुमले जनाएको छ । सोही आरोपमा उनीविरुद्ध गत असार ४ गते बिहीबार जिल्ला प्रहरी कार्यालय तेह्रथुममा दस्तखत किर्ते सम्बन्धी मुद्दा दर्ता भएको थियो ।

मुद्दा दर्ता भएकै दिन तेह्रथुम जिल्ला अदालतबाट पक्राउ पुर्जी जारी भएपछि प्रहरी टोलीले बिहीबार साँझ ५ः३० बजे बराललाई पक्राउ गरेको हो । पक्राउ परेका बराललाई अहिले प्रहरी हिरासतमा राखिएको छ ।