धनकुटामा भरुवा बन्दुक पड्‌किँदा एक जनाको मृत्यु

धनकुटा । धनकुटामा भरुवा बन्दुक पड्किएर एक जनाको मृत्यु भएको छ । मृत्यु हुनेमा महालक्ष्मी नगरपालिका–९ का ४७ वर्षीय रामकृष्ण थापा छन् ।

शुक्रबार साँझ करिब ६ः३० बजे थापाले सफा गर्ने क्रममा बारुद लोड भएको भरुवा बन्दुकको नाल आगोमा तताएर मुखले फुक्ने क्रममा अचानक पड्किएको प्रहरीले जनाएको छ ।

Advertisement

बन्दुक पड्‌किँदा बारुदले मुखमा लागेर घाइते भएका उनलाई उपचारका लागि जिल्ला अस्पताल धनकुटामा ल्याइएको थियो । उनको उपचारको क्रममा रातको ९ः३० बजे मृत्यु भएको धनकुटाका प्रहरी प्रवक्ता डीएसपी हेमन्त भण्डारीले जानकारी दिए ।

बन्दुक नियन्त्रणमा लिएर घटना बारे अनुसन्धान सुरु गरिएको प्रहरीले जनाएको छ ।