४० हजार घुससहित पक्राउ परे सशस्त्र प्रहरीका इन्स्पेक्टर

जनकपुरधाम । सशस्त्र प्रहरीका इन्स्पेक्टर ४० हजार घुससहित पक्राउ परेका छन् । अख्तियार दुरुपयोग अनुसन्धान आयोग बर्दिबासको कार्यालयले प्रहरी निरीक्षक ओकिल अधिकारीलाई घुस रकमसहित पक्राउ गरेको हो ।

आयोगले स्टिङ अपरेशनमार्फत प्रहरी निरीक्षक अधिकारीलाई पक्राउ गरेको हो । उनलाई पूर्व-पश्चिम राजमार्गमा रहेको धनुषाको लालगढबाट पक्राउ गरिएको आयोगले जनाएको छ ।
कमला-ढल्केवर-बाग्मती सडक निर्माण खण्डअन्तर्गत माटो तथा ग्राभेल फिलिङ कार्यमा प्रयोग हुने सवारी साधनहरू रोक्ने, अनावश्यक अवरोध सिर्जना गर्ने र घुस माग्ने गरेको उजुरीको आधारमा अख्तियारको टोलीले निगरानी गर्दै आएको थियो ।