भोजपुरको अरुण गाउँपालिकामा घर र दुई वटा मोटरसाइकलमा आगजनी

भोजपुर । भोजपुरको अरुण गाउँपालिका-४ चरम्बीमा आगजनीबाट एक घर जलेर नष्ट भएको छ । आगजनीबाट रणबहादुर भुजेलको घरसहित दुईवटा मोटरसाइकल जलेर नष्ट भएका हुन् ।

‘आगो कसले लगायो भन्ने खुल्न बाँकी छ’, जिल्ला प्रहरी कार्यालय भोजपुरका सूचना अधिकारी उमेश यादवले संगालोखबरसँग भने, ‘प्रहरीलाई पनि बिहान मात्रै जानकारी आयो । राति १२ बजेपछि आगो लागेको भन्ने जानकारी प्राप्त भएको छ ।’

उनका अनुसार आगजनीबाट घर र दुई वटा मोटरसाइकलमा क्षति पुगेको छ । अज्ञात व्यक्तिले आगजनी गरेको भनेर प्रहरीलाई खबर गरिएपनि अहिलेसम्म कसले किन आगो लगायो भन्ने खुल्न सकेको छैन ।

अहिले प्रहरीको टोली घटनास्थलमा पुगेर अनुसन्धान गरिरहेको यादवले जानकारी दिए । आगजनीका कारण भएको क्षतिको विवरण आउन बाँकी छ ।