झापा र सुनसरीबाट लागूऔषधसहित ६ जना पक्राउ

विराटनगर । कोशीका दुई जिल्लाबाट लागूऔषधसहित ६ जना पक्राउ परेका छन् । झापा र सुनसरीबाट उनीहरू पक्राउ परेका हुन् । गोप्य सूचनाका आधारमा इलाका प्रहरी कार्यालय दमकबाट खटिएको प्रहरी टोलीले चार जनालाई पक्राउ गरेको छ ।

पक्राउ पर्नेमा दमक नगरपालिका-४ का १९ वर्षीया प्रिया तामाङ, दमक-५ का १९ वर्षीय सुमित सुन्दास, २१ वर्षीय प्रवीन चेम्जोङ र दमक-१० का २७ वर्षीय मनोज खनाल छन् ।

उनीहरूलाई ३५० क्याप्सुल र ३५० चक्की लागूऔषधसहित दमक-४ बाट नियन्त्रणमा लिएको प्रहरीले जनाएको छ ।

यसैगरी इलाका प्रहरी कार्यालय इटहरीले धनकुटाको साँगुरीगढी गाउँपालिका-६ का २६ वर्षीय धिरेन राई र २७ वर्षीय धिरज मगरलाई २ ग्राम ब्राउन सुगरसहित इटहरी-४ बाट नियन्त्रणमा लिएको छ ।

उनीहरूका सम्बन्धमा आवश्यक अनुसन्धान भइरहेको कोशी प्रदेश प्रहरी कार्यालय विराटनगरले जनाएको छ ।