सोलुखुम्बुमा छोरीलाई खुकुरी हानेर बाबु फरार, उपचारका लागि काठमाडौं लगियो

विराटनगर । सोलुखुम्बुमा बालिका छोरीलाई खुकुरी हानेर बाबु फरार भएका छन् । थुलुङ दूधकोशी गाउँपालिका-९ गोपेका ३२ वर्षीय चामकुमार तामाङले आफ्नै ५ वर्षीया छोरी पवित्रालाई आज बिहान खुकुरी हानेका हुन् ।

खुकुरी प्रहारबाट बालिका गम्भीर घाइते भएकी छन् । सोलुखुम्बुमा उपचार सम्भव नभएपछि उनलाई थप उपचारका लागि हेलिकोप्टरमार्फत काठमाडौं लगिएको छ ।

उनको कान, निधारलगायत शरीरका विभिन्न भागमा गहिरो चोट लागेको प्रहरीले जनाएको छ ।

‘पालिकाले उद्धार गरेर बालिकालाई थप उपचारका लागि काठमाडौं पठाएको छ’, सोलुखुम्बु प्रहरी प्रमुख डीएसपी द्वारिकाप्रसाद घिमिरेले संगालोखबरसँग भने, ‘बालिकाको बुबालाई खोजी गरिरहेका छौँ । बाँकी कुरा खुल्न बाँकी छ ।’