संखुवासभाको बाह्रबिसेमा आगलागी हुँदा पाँच घर जलेर नष्ट

विराटनगर । सङ्खुवासभाको सभापोखरी गाउँपालिका-६ स्थित बाह्रबिसे बजारमा आगलागी हुँदा पाँच घर जलेका छन् । बुधबार दिउँसो करिब सवा तीन बजे स्थानीय रामकुमार राईको भान्साघरबाट आगलागी सुरु भएको थियो ।

राईको भान्साघरबाट सुरुभएको आगलागीबाट अन्य घरहरू पनि पूर्ण रूपमा जलेर नष्ट भएका संखुवासभाका प्रहरी निरीक्षक रामकुमार लामिछानेले जानकारी दिए ।

आगलागीबाट राईको दुई तले घर, अमृता लालसिंह लिम्बु र सुशील तामाङको दुईतले दुई/दुई वटा घर जलेर नष्ट भएका लामिछानेले जानकारी दिए । आगलागीको कारण खुल्न सकेको छैन ।

नेपाल प्रहरी, नेपाली सेना र स्थानीयवासीको सहयोगमा करिब एक घण्टा पछि आगो नियन्त्रणमा आएको थियो । ‘क्षतिको विवरण आउन बाँकी छ’, लामिछानेले संगालोखबरसँग भने, ‘ठूलै घटना भएकाले केही समय लागेको हो । क्षतिको विवरण सङ्कलन भइरहेको छ ।’