संगालोखबर 
विराटनगर । इटहरी-२० तरहरामा मोटरसाइकल दुर्घटना हुँदा युवकको मृत्यु भएको छ । मंगलबार साँझ भित्री सडकखण्डबाट तरहरा बजारतर्फ आउँदै गरेको को ३८ प २००९ नम्बरको मोटरसाइकल आँफै अनियन्त्रित दुर्घटना भएको हो ।
दुर्घटनामा भोजपुरको हतुवागढी गाउँपालिका-५ का ३१ वर्षीय विजय राईको मृत्यु भएको प्रहरीले जनाएको छ । उनी नेकपा एमाले हतुवागढी-५ का अध्यक्ष हुन् । प्रहरीका अनुसार मोटरसाइकल अनियन्त्रित भएर विजुलीको पोलमा ठोक्किएको थियो ।
Advertisement
दुर्घटनामा गम्भीर घाइते भएका उनलाई उपचारका लागि बीपी कोइराला स्वास्थ्य विज्ञान प्रतिष्ठान धरान पठाइएकोमा चिकित्सकले मृत घोषणा गरेका थिए । दुर्घटनामा इटहरी-२० बस्ने १९ वर्षीय अनिष बस्नेत घाइते भएका प्रहरीले जनाएको छ ।
बस्नेतलाई प्रहरीले नियन्त्रणमा लिएको छ । प्रहरीका अनुसार मोटरसाइकल कसले चलाएको थियो भन्ने खुल्न बाँकी छ । घटनाका सम्बन्धमा थप अनुसन्धान भइरहेको छ ।
