तेह्रथुमको प्रणामी माविको भवन प्रधानमन्त्री ओलीले उद्‌घाटन गर्ने

तेह्रथुम । तेह्रथुमको प्रणामी माध्यमिक विद्यालयको नयाँ भवन प्रधानमन्त्री केपी शर्मा ओलीद्वारा उद्‌घाटन हुने भएको छ । आठराई गाउँपालिका-४ इवामा अवस्थित उक्त विद्यालयको नवनिर्मित १८ कोठे पक्की भवन निर्माण भएको छ । उक्त भवनको मंसिर २६ गते प्रधानमन्त्री ओलीले उद्‌घाटन गर्ने कार्यक्रम तय भएको हो ।

प्रधानमन्त्री ओलीको औपचारिक शिक्षा यही विद्यालयबाट प्रारम्भ भएको थियो । ओम हङ गिल फाउन्डेशन दक्षिण कोरियाबाट चार करोड ४९ लाख ६० हजार, कोशी प्रदेश सरकारबाट २१ लख ४० हजार, गाउँपालिकाबाट ६९ लाख र अन्य सहयोगसहित करिब पाँच करोड पचास लाख रुपैयाँ लगानीमा भवन निर्माण भएको हो ।

विद्यालयमा नयाँ भवन निर्माणसँगै गुणस्तरीय शिक्षा प्रदान गर्न थप सुविधा उपलब्ध भएको विद्यालय व्यवस्थापन समितिका अध्यक्ष भीमप्रसाद घिमिरेले बताए । उद्‌घाटन समारोहको सम्पूर्ण तयारी पूरा भएको विद्यालयका प्रधानाध्यापक अमृतबहादुर बुढाथोकीले जानकारी दिए ।