ताप्लेजुङमा बाढीले पुल बगायो

ताप्लेजुङ । अविरल वर्षासँगै राते खोलामा आएको बाढीले ताप्लेजुङको फक्ताङलुङ गाउँपालिका–६ लेलेपमा ट्रस पुल बगाएको छ । बाढीले गएराति उक्त पुल बगाएपछि आउजाउमा कठिनाइ भएको छ ।

प्रहरी नायव उपरीक्षक (डीएसपी) रवि रावलका अनुसार पुल बाढीले बगाएपछि कञ्चनजंघा आधार शिविर घुन्सा जान र त्यताबाट सदरमुकामतर्फ आउन स्थानीय बासिन्दालाई समस्या भएको छ ।

ताप्लेजुङमा अहिलेसम्म बाढी र पहिरोका कारण २६ घरमा पूर्ण क्षति पुगेको छ । ४५ घर उच्च जोखिममा रहेका र ८१ घर जोखिममा रहेको प्रमुख जिल्ला अधिकारी रवीन्द्र आचार्यले जानकारी दिए । यो वर्षको मनसुन सुरु भएयता बाढी–पहिरोमा पाँच जनाको मृत्यु भएको प्रहरीले जनाएको छ ।