संगालोखबर 
विराटनगर । नेपाल पत्रकार महासंघको शनिबार हुने भनिएको निर्वाचन अन्तिम समयमा स्थगित भएको छ । निर्वाचन स्थगित गरिएको जानकारी दिँदै मतदाता नामावलीमा देखिएको विवाद समाधानका लागि प्रयास जारी रहेकाले असार दोस्रो हप्ताभित्रै मतदान गर्नेगरी नयाँ मिति तय गरिने महासंघका अध्यक्ष विपुल पोखरेलले बताएका छन् ।
शुक्रबार राति सूचना जारी गर्दै पोखरेलले भनेका छन्, ‘जेठ २६ गतेका लागि निर्वाचनको मिति तोकिएकोमा उक्त मितिमा मतदान नहुने भएको छ । मतदाता नामावलीमा देखिएको विवाद समाधानका लागि प्रयास जारी रहेकाले असार दोस्रो हप्ताभित्रै मतदान गर्नेगरी अध्यक्ष मण्डलसँगको परामर्शमा अर्को मिति तय हुने जानकारी गराइन्छ ।’
महासंघको मतदाता नामावलीका विषयमा विवाद भएपछि महासंघमा आवद्ध विभिन्न पत्रकार संघ संस्थाले केन्द्रदेखि जिल्ला सम्मका महासंघका कार्यालयमा तालाबन्दी गरेका थिए । निर्वाचन समिति गठन गर्न बाँकी शाखा समिति, एसोसिएट संस्था र प्रदेश समितिलाई यथाशीघ्र निर्वाचन समिति गठन गरेर केन्द्रीय निर्वाचन समितिलाई जानकारी गराउनका लागि पनि पोखरेलले सूचनामार्फत आग्रह गरेका छन् ।
