साथीलाई जोगाउन खोज्दा इलाममा पोखरीमा डुबेर किशोरीको मृत्यु

इलाम । साथीलाई पोखरीमा डुब्नबाट बचाउन खोज्दा दक्षिणी इलामको चुलाचुलीकी एकजना किशोरीको डुबेर मृत्यु भएको छ । चुलाचुली गाउँपालिका–४ स्थित ऐना पोखरीमा डुबेर स्थानीय १८ वर्षीया बिनिता जोगीको मृत्यु भएको हो ।

साथीहरुसँग पोखरीको डिलमा बसेर खेलिरहेका बेला बिहिवार अपराह्न उनी डुबेकी थिइन् । प्रहरीका अनुसार बिनिता, उनकी साथी १८ वर्षीया रोजिना साम्बा लिम्बु र उनकी बहिनी १७ वर्षीया रोशा साम्बा लिम्बु पोखरीको डिलमा बसेर खेलिहरेका थिए ।

त्यही क्रममा अचानक रोजिना डिलबाट चिप्लिएर पोखरीमा खस्न लाग्दा उनलाई हातमा समातेर बचाउने क्रममा बिनिता हुत्तिएर पोखरीमा खसेको प्रहरीले जनाएको छ ।

घटनाको जानकारी पाएर पुगेको पेल्टीमारीस्थित प्रहरी चौकीको टोलीले उनलाई पोखरीबाट बाहिर निकालेको थियो । बाहिर निकाल्दा उनको मृत्यु भइसकेको प्रहरीले जनाएको छ ।