सगरमाथा आरोहणपछि फर्कने क्रममा नेपालीसहित दुई आरोही बेपत्ता

सोलुखुम्बु । सर्वोच्च शिखर सगरमाथा आरोहण गर्न आएका दुईजना आरोही बेपत्ता भएका छन् । बेपत्ता हुनेमा एक नेपाली र एक बेलायती नागरिक छन् । मंगलबार सगरमाथा चुचुरोबाट फर्कने क्रममा संखुवावासभाको मकालु गाउँपालिका–२ का २१ वर्षीय पास तेन्जी शेर्पा र बेलायती नागरिक ४० वर्षीय ड्यानियल पउल पिटरसन बेपत्ता भएका हुन् ।

पर्यटन विभागका निर्देशक कालीबहादुर भुजेलका अनुसार चुचुरोमा पुगेर फर्कने क्रममा ८ हजार सात सय ५० मिटरको उचाइमा अवस्थित साउथ समिट नजिक चिप्लिएर दुवै जना बेपत्ता भएका हुन् ।

दुवै जनाले जेठ ८ गते बिहान सगरमाथाको सफल आरोहण गरेका थिए । शेर्पा र पिटरसन यस वर्षको वसन्त ऋतुमा सगरमाथा आरोहणका लागि २२ चैतमा एटके एक्सपिडिसन प्रालि मार्फत् आरोहणका लागि आएका थिए ।

उनीहरुको खोजी गर्न कम्पनीले ६ अनुभवी हिमाली पथप्रदर्शक परिचालन गरेको पर्यटन विभागले जनाएको छ । बेपत्ताको खोजीमा सहयोग गरिदिनसमेत विभागले विज्ञप्तिमार्फत अनुरोध गरेको छ ।