बिराटनगर । झापा र उदयपुरमा सवारी दुर्घटना हुँदा तीन जनाको मृत्यु भएको छ । दुर्घटनामा परी झापामा दुई र उदयपुरमा एक जनाको मृत्यु भएको हो । झापाको शिवसताक्षी नगरपालिका–८ झिलझिलेमा बसको ठक्करवाट मोटरसाइकलमा सवार दुई जनाको मृत्यु भएको छ ।
Advertisement
पूर्वबाट पश्चिततर्फ जाँदै गरेको को १ ख ६०९८ नम्बरको बसले बिपरीत दिशाबाट आउँदै गरेको प्रदेश १–०२–०४३ प ९२१८ नम्बरको मोटरसाइकललाई ठक्कर दिदा मोटरसाइकलमा सवार सुनसरी महेन्द्रनगरका ३१ बर्षीय ज्ञानेन्द्र तामाङ र इटहरीकी २८ बर्षीया सलिना राईको मृत्यु भएको हो । ठक्कर दिने बस र चालकलाई इलाका प्रहरी कार्यालय झिलझिलेले नियन्त्रणमा लिएको छ ।
त्यस्तैगरी, उदयपुरको रौतामाई गाउँपालिका–१ मा ट्याक्टर दुर्घटना हुँदा चालकको मृत्यु भएको छ । गाइघाटबाट नामेटारतर्फ जाँदै गरेको प्रदेश २–०२–०१–०००१ त १०१७ नम्बरको ट्याक्टर पल्टिँदा त्रियुगा नगरपालिका–७ का चालक २० बर्षीय केशव बिकको घटनास्थलमै मृत्यु भएको जिल्ला प्रहरी कार्यालय उदयपुरले जनाएको छ ।
