धनकुटा । छथर जोरपाटी गाउँपालिकाले अपाङ्गता भएका व्यक्तिहरुलाई गाउँमै पुगेर परिचय–पत्र वितरण गर्न थालेको छ । गाउँ–गाउँमा शिविर गरेर मंगलवारवाट अपाङ्गता परिचय पत्र वितरण थालिएको हो । करुणा फाउण्डेशन नेपालको सहयोगमा पहिलो दिन वडा नं. १ हात्तिखर्कबाट परिचयपत्र वितरण शिविर शुरु गरिएको छ ।
Advertisement
शिविर उद्घाटन गर्दै गाउँपालिका अध्यक्ष शेरबहादुर लिम्बूले भत्ता लिन मात्र नभएर बिभिन्न सेवा सुविधाका लागि पनि परिचय पत्र आवश्यक पर्ने भएकाले शिविरमा सबै खालका अपाङ्गता भएकाहरुलाई सहभागि हुन आग्रह गरे । कार्यक्रममा करुणा फाउण्डेशन नेपाल जिल्ला कार्यालय धनकुटाका प्रमुख जितेन्द्र श्रेष्ठले कस्तो अपाङ्गता भएकाले कुन प्रकारको परिचय पत्र पाउने जानकारी दिए ।
शिविरमा गाउँपालिका उपाध्यक्ष तथा अपाङ्ग समन्वय समिति संयोजक भीमकला श्रेष्ठ, महिला वालवालिका शाखाका प्रमुख एलिना निरौला, प्रशासन शाखाका अधिकृत नेत्रबहादुर श्रेष्ठ लगायतले परिचय पत्र वितरण गरेका छन् ।
शिविरमा अपाङ्गता परीक्षणका लागि जनरल फिजिसियन प्रसंशा न्यौपाने, आँखा रोग बिशेषज्ञ सचिन लम्साल, नाक कान घाँटी रोग बिशेषज्ञ ललनकुमार चौधरी र फिजियोथेरापिस्ट अर्पना राईको टोली खटिएको छ ।
छथर जोरपाटीमा ३२१ जना अपाङ्गता भएका व्यक्ति रहेको गाउँपालिकाको तथ्यांक छ । जसमध्ये वडा नं. १ मा ८६ जना छन् । अब, ६ वटै वडामा शिविर चलाएर परिचयपत्र वितरण गरिने गाउँपालिकाले जनाएको छ ।
