गोमा ढुंगाना/संगालोखबर 
धनकुटा । धनकुटाको महालक्ष्मी नगरपालिका-७ जितपुरमा करेन्ट लागेर एक जनाको मृत्यु भएको छ । निर्माणाधीन नगर अस्पतालमा शनिवार साँझ करिब ५ बजे पानी तान्ने मोटरबाट विद्युत सर्ट भएर करेन्ट लाग्दा महालक्ष्मी-६ बस्दै आएका ४१ वर्षीय राजकुमार राईको मृत्यु भएको हो ।
भोजपुरको साल्पासिलिछो गाउँपालिका घर भएका राई निर्माण व्यवसायी हुन् । सोही नगर अस्पताल निर्माणको काम गर्दै आएका राई करेन्ट लागेर गम्भीर घाइते भएका थिए । उनलाई उपचारका लागि प्राथमिक स्वास्थ्य केन्द्र जितपुर पुर्याइएको थियो ।
उपचारकै क्रममा उनको मृत्यु भएको धनकुटाका प्रहरी प्रवक्ता डीएसपी हेमन्त भण्डारी क्षेत्रीले जानकारी दिए । मृतकको शवलाई पोष्टमार्टमका लागि धनकुटा जिल्ला अस्पताल ल्याइएको छ ।
