संगालोखबर 
विराटनगर । सिटी सफारीमा यात्रुले छाडेको गरगहना तथा कपडासहितको झोला चालकले ट्राफिक प्रहरीमा बुझाएपछि सम्बन्धित धनीलाई हस्तान्तरण गरिएको छ ।
भदौ २३ गते विराटनगरको बरगाछी चोकबाट हाटखोला जाने क्रममा एक यात्रुले सफारीमा छाडेको समान सम्बन्धित व्यक्तिलाई बुझाइएको हो ।
को १ ह १९८५ नम्बरको सिटी सफारीका चालक विराटनगर-५ चाँदनी चोक बस्ने ४४ वर्षीय दीपेन्द्र कुमार दासले झोला फेला पारेपछि जिल्ला ट्राफिक प्रहरी कार्यालय मोरङमा बुझाएका थिए ।
अनुसन्धानका क्रममा उक्त सामान मोरङको कटहरी गाउँपालिका-२ निवासी शेया सरकारको भएको खुलेपछि सम्बन्धित व्यक्तिलाई बुझाइएको मोरङका ट्राफिक प्रमुख इन्स्पेक्टर सन्तोष न्यौपानेले जानकारी दिए ।
सफारी चालक दासको अनुकरणीय र इमानदार कार्यप्रति ट्राफिक प्रहरी मोरङले प्रशंसा व्यक्त गरेको छ । हराएको सामान फेला परेपछि शेया पनि हर्षित भएकी छन् ।
