संगालोखबर 
विराटनगर । विराटनगरको कान्तिपुर कलेजले रसुवाको भोटेकोशी बाढीपीडितलाई ५ लाख १ हजार १ सय ११ रुपैयाँ सहयोग गरेको छ । प्रधानमन्त्री दैवी प्रकोप उद्धार कोषमा रकम जम्मा हुने गरी कलेजले आज हिसानमार्फत चेक प्रदान गरेको हो ।
कलेजको तर्फबाट हिसानका केन्द्रीय सचिव राजेश कार्कीलाई चेक हस्तान्तरण गरिएको छ । हिसानका केन्द्रीय सह-कोषाध्यक्ष शंकर भट्टराई, हिसान कोशी प्रदेश सचिव दिपेश बास्तोला, जिल्ला अध्यक्ष अमित ढकाल, प्याब्सन विराटनगर महानगर अध्यक्ष अर्जुन श्रेष्ठ तथा कान्तिपुर कलेजका निर्देशकहरूको उपस्थितिमा चेक हस्तान्तरण गरिएको हो ।
विपद्का बेला सहयोग गर्नु सबैको दायित्व भएकाले विद्यार्थी, शिक्षक, कर्मचारी तथा कलेज परिवारको तर्फबाट सहयोग गरिएको कान्तिपुर कलेजका प्रिन्सिपल भुवन नेपालले जानकारी दिए । उनले सहयोगी मनहरूप्रति आभार पनि प्रकट गरेका छन् ।
भोटेकोशी बाढीपीडितका लागि कोशी प्रदेशबाट पनि स्वतस्फुर्त रुपमा ठूलो मात्रामा सहयोग जुटिरहेको छ । प्रदेशबाट विभिन्न संघसस्था र व्यक्तिले करोडौँ रकम कोषमा जम्मा गरिसकेका छन् ।
