संगालोखबर 
झापा । झापाको कचनकवल गाउँपालिका-१ स्थित चिया बगानमा खेत जोत्ने क्रममा ट्याक्टर पल्टिँदा ८ वर्षीय बालकको मृत्यु भएको छ । दुर्घटनामा ट्याक्टरमा सवार भारतको बिहार राज्य किसनगन्ज जिल्ला जोरबारी जियापोखेर-७ का ८ वर्षीय सिमोन सोरेनको मृत्यु भएको हो ।
खेत जोत्दै गरेको प्र १-०१-००१ त ८९९२ नम्बरको ट्याक्टरमा सवार सोरेन दुर्घटनापछि घाइते भएका थिए । घाइते सोरेनलाई आफन्तले उपचारका लागि भारततर्फ लैजाँदै गर्दा बाटोमै मृत्यु भएको प्रहरीले जनाएको छ ।
उक्त खेत भद्रपुर नगरपालिका निवासी मोहन अग्रवालको रहेको र भारतका बाबुलाल मण्डीले जोत्दै आएको प्रहरीले जनाएको छ । ट्याक्टरका साहु भारतको बिहार राज्य किसनगन्ज जिल्ला गिलाबारीका अजय भट्टिया रहेको खुलेको छ ।
ट्याक्टर चालक भारतीय नागरिक रहेको र उनको नामथर तथा ठेगाना खुल्न बाँकी रहेको प्रहरीको भनाइ छ । प्रहरीका अनुसार दुर्घटनापछि फरार भएका चालकको खोजी भइरहेको छ ।
