संगालोखबर 
विराटनगर । राष्ट्रिय पत्रकारिता दिवसको अवसरमा कोशी प्रदेश सरकारले ८ जना पत्रकारलाई पुरस्कृत गरेको छ । पत्रकारिता क्षेत्रमा पुर्याएको योगदानको कदर गर्दै प्रदेश सरकारले पत्रकारहरूलाई पुरस्कृत गरेको हो ।
कोशी प्रदेशको आन्तरिक मामिला तथा कानुन मन्त्रालयको आयोजनामा भएको कार्यक्रममा अग्रज पत्रकारहरू सिद्धराज राई (धनकुटा), विवेक गौतम (मोरङ), शेखर रेग्मी (मोरङ), रेजिना गौतम (ताप्लेजुङ), सन्तोष रुचाल (धनकुटा), मनोज श्रेष्ठ (सोलुखुम्बु), श्यामसुन्दर सुतियार (मोरङ) र गोपाल दाहाल (सुनसरी) सम्मानित भएका छन् ।
उनीहरूलाई कोशी प्रदेशका मुख्यमन्त्री हिक्मतकुमार कार्की, आन्तरिक मामिला तथा कानुन मन्त्री इन्द्रमणि पराजुली लगायतले १ लाख रुपैयाँसहित पुरस्कार प्रदान गरेका हुन् ।
पत्रकारितामार्फत सामाजिक सरोकारका विषयहरू उजागर गर्दै जनतासम्म सूचना पुर्याउने भूमिकामा उल्लेखनीय योगदान गरेका पत्रकारहरूलाई सम्मान गरिएको आन्तरिक मामिला तथा कानुन मन्त्री इन्द्रमणि पराजुलीले बताए ।
पत्रकारिता लोकतन्त्रको महत्वपूर्ण आधार भएकाले सत्य, निष्पक्ष र जिम्मेवार पत्रकारिताले समाजलाई सही दिशातर्फ लैजान मद्दत गर्ने वक्ताहरूले धारणा व्यक्त गरेका थिए । प्रदेश सरकारले आगामी दिनमा पनि पत्रकारहरूको क्षमता विकास र स्वतन्त्र पत्रकारितालाई प्रोत्साहन गर्ने प्रतिबद्धता जनाएको छ ।
