भोजपुरको आमचोकबाट ६२२ किलो गाँजा बरामद

भोजपुर । भोजपुरको आमचोक गाउँपालिका-८ बाट ६ सय २२ किलो ३ सय ग्राम गाँजा बरामद भएको छ । गाँजा ओसार-पसार भइरहेको छ भन्ने गोप्य सूचनाका आधारमा खटिएको प्रहरी टोलीले आइतबार बरामद गरेको हो ।

जिल्ला प्रहरी कार्यालय भोजपुरबाट खटिएको प्रहरी टोलीले स्थानीय राम बहादुर श्रेष्ठको जग्गामा रहेको टहरोमा लुकाएर राखेको अवस्थामा गाँजा बरामद गरेको हो । प्रहरीका अनुसार ३८ वटा प्लास्टिकको बोरामा लुकाएर राखेको अवस्थामा गाँजा फेला परेको थियो ।

यस्तै सोही स्थानबाट १८ किलो ३ सय ३४ ग्राम गाँजाको भुस बरामद भएको प्रहरीले जनाएको छ । गाँजा ओसार-पसार तथा बिक्री वितरणमा संलग्न व्यक्तिहरूको खोजी भइरहेको कोशी प्रदेश प्रहरी कार्यालय विराटनगरले जनाएको छ ।