सन्तोष सुवेदी/संगालोखबर 
धनकुटा । धनकुटाका महिलाहरू मौलिक परम्परा अनुसार बजाइने नौमती पञ्चेबाजा संरक्षणमा जुटेका छन् । पछिल्लो समय युवा पुस्ताको ध्यान आधुनिकतामा गएसँगै संस्कृतिलाई जगेर्ना गर्न महिलाहरू पञ्चेबाजा संरक्षणमा जुटेका हुन् ।
कुनै पनि धार्मिक कार्य, विवाह, व्रतबन्ध, विभिन्न समारोह तथा सांस्कृतिक कार्यक्रममा महिलाहरू पञ्चेबाजा बजाउन थालेका छन् । त्यसमा पनि एकल जातीले मात्रै नौमती पञ्चेबाजा बजाउने प्रचलन थियो । तर त्यसलाई चिर्दै धनकुटामा महिलाहरूको नेतृत्वमा नौमती पञ्चेबाजा बजाउन थालिएको छ ।
उनीहरू शुल्क लिएर पार्टी तथा समारोहमा सामूहिक रूपमा बाजा बजाउने गरेका छन् । धनकुटा नगरपालिका-७ स्थित निशान नौमती पञ्चेबाजा सांस्कृतिक समूहका महिलाहरू पञ्चेबाजा बजाउने तालिम लिएपश्चात् सक्रिय छन् ।
धनकुटा नगरपालिकाका विभिन्न वडामा महिलाहरूलाई सामूहिक रूपमा नौमति पञ्चेबाजा बजाउने तालिम प्रदान गर्दै आएको घरेलु तथा साना उद्योग कार्यालयले जनाएको छ ।
धनकुटाको कचिडेका महिलाहरू पनि सक्रिय रूपमा पञ्चेबाजा संरक्षणमा लागि परेका छन् । सुरुवाती चरणमा भएपनि सहजता पञ्चेबाजा बजाउन सहजै भएको उनीहरूको भनाइ छ ।
