खोटाङका केशरबहादुरले लिए ७० वर्षको उमेरमा नागरिकता

खोटाङ । खोटाङको साकेला गाउँपालिका-१ बाँझेच्यानडाँडाका केशरबहादुर बुढाथोकीले ७० वर्षको उमेरमा नागरिकताको प्रमाणपत्र लिएका छन् । २०१३ साल फागुन ७ गते जन्मिएका उनले जिल्ला प्रशासन कार्यालयबाट आइतबार पहिलो पटक नागरिकताको प्रमाणपत्र लिएका हुन् ।

नागरिकता नहुँदा छोरा-छोरीहरू शिक्षा, स्वास्थ्य र रोजगारीबाट बञ्चित हुनुपरेपछि ढिलै भएपनि नागरिकता लिएको उनले सुनाए । १४ वर्षको उमेरमै रोजगारीको सिलसिलामा भारत गएका उनी ५६ वर्षको उमेरमा जिल्ला फर्किएर नागरिकता लिएका हुन् ।

उनले भारतबाट फर्किएर कञ्चनपुरमा मजदुरीको काम गर्न थालेको र त्यही विवाह भएको बताए । उनका २२ र आठ वर्षका दुई छोरी छन् ।

घर छाडेको ५६ वर्षपछि जिल्ला फर्किएका केशरबहादुरलाई जेठा दाजु मदनबहादुरको सनाखतमा प्रशासनले नागरिकता दिएको छ । आफूले नेपाली नागरिकताको प्रमाणपत्र पाएसँगै श्रीमतीको विवाह दर्ता र छोरीहरूको जन्मदर्ता गर्ने बाटो खुलेको केशरबहादुरले बताए ।