लोमशले उत्पादन गरेको प्यारासिटामोल गुणस्तरहीन पाइएपछि फिर्ता गर्न निर्देशन

काठमाडौं । लोमश फर्मास्युटिकल्स प्रालिले उत्पादन गरेको प्यारासिटामोल गुणस्तरहीन पाइएपछि बजारबाट तत्काल फिर्ता गर्न निर्देशन दिइएको छ । औषधि व्यवस्था विभागले प्यारासिटामोल ट्याब्लेट (सेटोफेन) ब्याच नं. सीटी २७२३ गुणस्तरहीन पाइएपछि तत्काल बजारबाट फिर्ता गर्न निर्देशन दिएको हो ।

विभागले सूचना जारी गर्दै राष्ट्रिय औषधि प्रयोगशालामा गरिएको परीक्षणमा उक्त ब्याचको औषधि न्यून गुणस्तरको पाइएको भन्दै औषधि ऐन, २०३५ को दफा १४ बमोजिम बिक्री-वितरण रोक्का गरी उद्योगलाई बजारबाट फिर्ता गर्न आधिकारिक निर्देशन दिएको हो ।

सम्बन्धित ब्याचको उत्पादन मिति २०२३ जुन र म्याद सकिने मिति २०२६ मे रहेको छ । यस्तै उक्त औषधी बिक्री वितरण तथा प्रयोग नगर्न पनि विभागले अनुरोध गरेको छ ।