झापा कारागारका कैदीको उपचारका क्रममा मृत्यु

झापा । झापा कारागारमा कैद सजाय भुक्तान गरिरहेका एक कैदीको मृत्यु भएको छ । मृत्यु हुनेमा भारतको पश्चिम बंगाल दार्जिलिङ घर भएका ६१ वर्षीय कर्णबहादुर लिम्बु छन् ।

आज बिहान कारागारभित्रै लिम्बुलाई अचानक रक्तचाप सम्बन्धी समस्या देखिएको थियो । स्वास्थ्यमा समस्या आएपछि उनलाई उपचारका लागि भद्रपुरस्थित प्रादेशिक अस्पताल लगिएको थियो ।

जबरजस्ती करणी मुद्दामा दोषी ठहर भई विगत ६ वर्षदेखि जेलमा रहेका उनको उपचारका क्रममा मृत्यु भएको प्रहरीले जनाएको छ । उनी २०७५ साल साउन २९ गतेदेखि झापा कारागारमा थिए ।

उनको शव प्रादेशिक अस्पताल भद्रपुरमै राखिएको छ । मृतकका आफन्तलाई घटनाबारे जानकारी गराइसकेको प्रहरीले जनाएको छ ।