धनकुटामा पिकअप दुर्घटना

धनकुटा । धनकुटा नगरपालिका-८ टेकुनालामा पिकअप दुर्घटना भएको छ । टेकुनालाबाट धनकुटा बजारतर्फ आउँदै गरेको को २ च २३०९ नम्बरको पिकअप केही समय अघि दुर्घटना भएको हो ।

दुर्घटनामा परी घाइते भएकाहरूको संख्या यकिन हुँन बाँकी छ । करिब एक दर्जन व्यक्ति घाइते भएको धनकुटाका प्रहरी निरीक्षक किशोर तामाङले जानकारी दिए ।

‘घाइतेहरूलाई उद्धार गरेर अस्पताल पठाउँने काम भइरहेको छ, घाइतेको संख्या यकिन भइसकेको छैन,’ प्रहरी निरीक्षक किशोर तामाङले संगालोखबरसँग भने, ‘करिब एक दर्जन जति घाइतेहरूलाई अस्पताल पठाइएको छ ।’

घाइतेहरुलाई उद्धार गरेर उपचारका लागि धनकुटा जिल्ला अस्पताल ल्याइएको छ । गम्भीर अवस्थाका केही घाइतेहरूलाई थप उपचारका लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको छ ।

सो गाडीमा सवार अधिकांश यात्रु लाखे जात्रामा सहभागि हुन आउँदै थिए ।