गाईघाटबाट काँकडभिट्टाका लागि छुटेको बस सप्तरीमा दुर्घटना, तीन जनाको मृत्यु

विराटनगर । सप्तरीको कञ्चनरूप नगरपालिका-१० बदगामा यात्रुबाहक बस दुर्घटना हुँदा तीन जनाको मृत्यु भएको छ । दुर्घटनामा २६ जना घाइते भएका जिल्ला ट्राफिक प्रहरी कार्यालय सप्तरीले जनाएको छ ।

उदयपुरको गाईघाटबाट झापाको काँकडभिट्टाका लागि छुटेको प्रदेश १-०१-००१ ख ३४२० नम्बरको बस मध्यान्ह १२ बजेतिर दुर्घटनामा परेको हो । बसमा ३५ जना यात्रु सवार रहेको खुलेको प्रहरीले जनाएको छ ।

प्रहरीका अनुसार दुर्घटनामा सप्तरीको सप्तकोशी नगरपालिका-१ का ७५ वर्षीय रत्नबहादुर मगराती, झापाको गौरदह-२ का ३९ वर्षीय अनिल राई र उदयपुर त्रियुगा नगरपालिका-२ खैजनपुरकी २२ की कबिता चौधरीको मृत्यु भएको हो ।

प्रहरीका अनुसार मगरातीलाई विराटनगरको गोल्डेन अस्पताल ल्याइएकोमा चिकित्सकले मृत घोषणा गरेका थिए । दुई जनाको भने बसले किचेर घटनास्थलमै मृत्यु भएको जानकारी आएको जिल्ला ट्राफिक प्रहरी कार्यालय सप्तरीका प्रमुख रामबालक रायले संगालोखबरलाई जानकारी दिए ।

घाइतेमध्ये केहीलाई विराटनगरको गोल्डेन अस्पताल ल्याइएको छ भने केहीको कञ्चनरूप नगर अस्पतालमै उपचार भइरहेको प्रहरीले जनाएको छ ।

बस चालक झापाको मेचीनगर नगरपालिका-७ का ४७ वर्षीय अमृत दर्जीलाई नियन्त्रणमा लिएर घटनाका सम्बन्धमा थप अनुसन्धान सुरु गरिएको प्रहरीले जनाएको छ ।