भोजपुरको पौवादुङमा गाउँपालिकामा ‘कृषि एम्बुलेन्स’

विराटनगर । भोजपुरको पौवादुङमा गाउँपालिकाले कृषि उपजको सहज बजारीकरणका लागि ‘कृषि एम्बुलेन्स’ सेवा सञ्चालनमा ल्याएको छ । किसानले उत्पादन गरेका कृषि उपजलाई सहजरूपमा बाहिरी जिल्लाका बजारसम्म पुर्याउन कृषि एम्बुलेन्स सञ्चालनमा ल्याइएको हो ।

गाउँपालिकाले कृषिमा जोड दिएसँगै किसानले व्यावसायिक रूपमा विभिन्न नगदेबालीको खेती गरिरहेका छन् । उत्पादन भएका सम्पूर्ण कृषि उपजको सहज बजारीकरणका लागि एम्बुलेन्स सञ्चालनमा ल्याइएको गाउँपालिकाले जनाएको छ ।

गाउँपालिकाले किवी, अकबरे खुर्सानीलगायत अन्य विभिन्न नगदेबालीको खेतीमा अनुदानका कार्यक्रम सञ्चालन गरिरहेको छ । व्यवसायिक रूपमा कृषि कर्ममा लागेका सात सय बढी किसानलाई कृषि सामग्री वितरण गरिएको गाउँपालिकाले जनाएको छ ।