धनकुटाका उद्यमीको गुनासो : उत्पादनले उचित मूल्य र बजार पाउन सकेन

धनकुटा । धनकुटाका उद्यमीहरूले उत्पादन गरेका घरेलु वस्तुको उचित मूल्य र बजार नपाएको गुनासो गरेका छन् । आज घरेलु तथा साना उद्योग कार्यालय धनकुटाले गरेको औद्योगिक लगानी र रोजगारी सिर्जना विषयक अन्तरक्रिया कार्यक्रममा उद्यमीहरूले यस्तो गुनासो गरेका हुन् ।

धनकुटा-७ का व्यवसायी सुनिलकुमार डङ्गोलले फर्निचर बनाउन राम्रो काठको अभाव रहेको बताए । उनले राम्रो काठको अभावमा राम्रो फर्निचर बेच्न नपाएको गुनासो गरे । ‘ऐन कानुनको समस्याले धनकुटामा भएका राम्रा, बलियो र लामो समयसम्म टिक्ने काठ सहज तरिकाले किन्न नपाउँदा समस्या भएको छ’, उनले भने, ‘यस तर्फ सम्बन्धित निकायले ध्यान दिनुपर्ने अवस्था आएको छ ।’

अनुदानले व्यवसाय फस्टाए पनि लामो समय टिक्न नसक्दा अनुदान खेर गइरहेको मासु व्यवसायी सङ्घ धनकुटाका अध्यक्ष अजित पाख्रिनले बताए । उनले वास्तविक व्यवसायीलाई अनुदान नदिएका कारण यस्तो अवस्था निम्तिएको उल्लेख गरे । जसले गर्दा ठूला र पुराना व्यवसाय बन्द हुने अवस्थामा पुगेकाले सम्बन्धित निकायले चासो देखाउन आवश्यक रहेको भन्दै उनले ध्यानाकर्षण गराए ।

अन्य सहभागि किसानले बैंकले ऋण दिँदा एउटा ब्याजदर निर्धारण गर्ने गरेको र तिर्ने बेलामा दोब्बर बनाउने गरेको गुनासो गरे । तराइका बजारबाट सस्तो मूल्यका नाममा गुणस्तरहीन फलफूल तथा मासुजन्य वस्तु ल्याएर बेच्दा समेत घरेलु कार्यालय, नगरपालिका तथा उद्योग वाणिज्य सङ्घ मौन बसेको गुनासो पोखे ।

धनकुटाका पोल्ट्री व्यवसायी सन्देश आठपहरियाले बाह्य जिल्लाबाट कुखुरा र अण्डा आयात हुँदा आफूहरू मारमा परेको उल्लेख गरे । यसको निगरानी नहुँदा व्यवसाय नै धरापमा परेको उनको भनाइ थियो । घरेलु तथा साना उद्योग कार्यालयका अनुसार धनकुटामा चार हजार दुई सय २८ वटा उद्योग रहेका छन् । तर पछिल्लो समय दैनिक दुईतीन वटा उद्योग खारेजी भइरहेका कार्यालयका प्रमुख माधव बाँस्कोटाले बताए ।

उद्यमीलाई थप प्रोत्साहन गर्न कार्यलयले तालिमको आयोजना गर्दै आएको उनले सुनाए । उद्यमीलाई प्रोत्साहन गर्न धनकुटा नगरपालिका-६ स्थित अमलेटारमा रहेको औद्योगिकी ग्राममा ६२ वटा ब्लक बन्ने भनिएकोमा २४ वटा बनिसकेको उनले जानकारी दिए । उनका अनुसार अहिले १२ वटा ब्लक सञ्चालनमा रहेका र आगामी दिनमा उद्यमीको माग अनुसार अन्य कार्यक्रम ल्याइने बाँस्कोटाले बताए ।

उनले व्यवसायी तथा उद्यमीको समस्या समाधान गर्न सहयोग गर्ने प्रतिवद्धता समेत व्यक्त गरे । धनकुटाका प्रमुख जिल्ला अधिकारी टुवराज पोख्रेलले धनकुटामै उत्पादन भएको सामग्री प्रयोग गर्न र धनकुटाकै प्राविधिकमार्फत मर्मत कार्य गर्न जिल्लाका सरकारी कार्यालयमा पत्राचार गरि कार्यान्वय गर्ने प्रतिवद्धता जनाए ।

कार्यक्रममा जिल्लाभरिका उद्यमी तथा व्यवसायी, स्थानीय जनप्रतिनिधि, विभिन्न सरकारी कार्यालयका प्रमुख तथा प्रतिनिधीलगायतको उपस्थिति रहेको थियो ।