सन्तोष सुवेदी/संगालोखबर 
धनकुटा । पूर्वी नेपालको प्रमुख पर्यटकीय स्थल धनकुटाको भेडेटारमा अहिले फुड फेस्टिभलको रौनक छ । अंग्रेजी नयाँ वर्ष २०२५ को अवसर पारेर हरेक बर्ष झै यो वर्ष पनि आयोजना गरिएको फुड फेस्टिभल अर्थात खाना महोत्सवले भेडेटारको चिसो मौसमलाई तताएको छ ।
Advertisement
पर्यटन प्रवर्द्धन गर्ने उद्देश्यले होटल एशोसिएसन भेडेटारले १२ औं भेडेटार फुड फेस्टिभल आयोजना गरेको हो । अङ्ग्रेजी नयाँ वर्ष २०२४ को अन्तिम दिन मङ्गलबार कोशी प्रदेशका पर्यटन, वन तथा वातावरण मन्त्री सदानन्द मण्डलले उद्घाटन गरेपछि सुरु भएको महोत्सव बिहिबारसम्म सञ्चालन हुनेछ ।
फेस्टिभलमा खानाका परिकारसहितका २५ वटा स्टल राखिएको छ । स्थानीय जातीय खानाका परिकार, अर्गानिक तरकारी तथा फलफूल, हस्तकला, कृषि तथा घरेलु सामग्री बिक्री तथा प्रदर्शनीमा राखिएको छ । हरेक साँझ भइरहेको सांस्कृतिक कार्यक्रमले फेस्टिभलको माहोल तताएको छ । फेस्टिभलमा विभिन्न जातीय झाँकीहरू पनि प्रस्तुत गरिएको छ ।
तीन दिनसम्म चल्ने फेस्टिभलमा ५० हजार भन्दा वढी आन्तरिक तथा बाह्य पर्यटक भित्र्याएर २ करोड भन्दा बढीको आर्थिक कारोबार गर्ने आयोजकको लक्ष्य छ । फेस्टिभल अवलोकन र खानाका परिकारको स्वाद चाख्न पूर्वी नेपालका विभिन्न जिल्लासहित छिमेकी मुलुक भारतबाट पनि ठूलो सङ्ख्यामा पर्यटकहरू आएका छन् ।
अंग्रेजी नयाँ वर्षको अवसर पारेर हरेक साल भेडेटारमा यसरी नै फुड फेस्टिभल गरिदै आएको छ । फेस्टिभलले भेडेटारसहित आसपास क्षेत्रको पर्यटन प्रवर्द्धनमा सघाउ पुग्ने आयोजकको विश्वास छ ।
भिडियो…
