धनकुटाका ७७ प्रतिशत मानिस स्वास्थ्य बीमाको पँहुच बाहिर

धनकुटा । धनकुटामा कुल जनसङ्ख्या मध्ये करिब ७७ प्रतिशत मानिस स्वास्थ्य बीमाको पहुँचभन्दा बाहिर रहेको पाइएको छ । स्वास्थ्य बीमा बोर्ड धनकुटाका अनुसार कुल जनसङ्ख्या मध्ये २३ प्रतिशत मानिस मात्रै स्वास्थ्य बीमाको पहुँचमा छन् ।

एक लाख ५० हजार पाँच सय ९९ जनसङ्ख्या मध्ये ४९ हजार छ सय नौ जना मात्रै स्वास्थ्य बीमाको पहुँचमा छन् । जसमा २३ हजार नौ सय २८ पुरुष र २५ हजार छ सय ८१ जना महिला रहेका स्वास्थ्य बीमा बोर्ड धनकुटाकी प्रमुख सरिता बुढाथोकी बस्नेतले जानकारी दिइन् ।

नेपाल सरकारले नागरिकको स्वास्थ्य उपचारमा सहज पहुँच पुर्याउने उद्देश्यले राष्ट्रिय बीमा नीति २०७१ बमोजिम आर्थिक वर्ष २०७२/०७२ बाट स्वास्थ्य बीमा सुरु गरेको थियो ।

बीमा कार्यक्रम अन्तरगत पाँच जनाको परिवारले वार्षिक तीन हजार पाँच सय रुपैयाँ बुझाउनु पर्दछ । पाँच जनाभन्दा बढी सदस्य भएका थप सात सय रुपैयाँ बुझाउनुपर्ने हुन्छ । बीमा कार्यक्रम अन्तरगत पाँच जनाको परिवारले वार्षिक एक लाखसम्मको स्वास्थ्य उपचार सेवा उपभोग गर्न पाउने छन् ।