विराटनगरमा स्कारपियो भित्र भेटियो १५५ किलो गाँजा, चालकसहित दुई जना पक्राउ

विराटनगर । विराटनगरबाट गाँजासहित दुई जना पक्राउ परेका छन् । पक्राउ पर्नेमा धरान उपमहानगरपालिका-१२ का २४ वर्षीय राहुल विश्वकर्मा र धनकुटाको सहिदभूमि गाउँपालिका-६ का १९ वर्षीय सुरज राई छन् । जिल्ला प्रहरी कार्यालय मोरङबाट खटिएको प्रहरी टोलीले विराटनगर-१८ बाट उनीहरूलाई नियन्त्रणमा लिएको हो ।

को १ च ९५८२ नम्बरको स्कारपियो गाडीबाट एक सय ५५ किलो गाँजासहित उनीहरूलाई नियन्त्रणमा लिइएको मोरङका प्रहरी प्रवक्ता डीएसपी वेदप्रकाश जोशीले जानकारी दिए । मङ्गलबार पक्राउ परेका उनीहरूलाई जिल्ला प्रहरी कार्यालय मोरङले बुधबार पत्रकार सम्मेलन गरेर सार्वजनिक गरेको छ ।

Advertisement

राहुल स्कारपियोका चालक हुन् भने र सुरज गाडीमा सवार थिए । स्कारपियोमा गाँजा राखेर भारततर्फ लग्दै गरेको अवस्थामा उनीहरूलाई प्रहरीले पक्राउ गरेको हो ।

यसैगरी इलाका प्रहरी कार्यालय दुहबी सुनसरीले गढी गाँउपालिका-२ घर भएर हाल दुहबी नगरपालिका-३ बस्दै आएका २३ वर्षीय ओम चौधरीलाई एक किलो गाँजासहित पक्राउ गरेको छ ।