सुरु भयो १२ औं भेडेटार फुड फेस्टिभल

धनकुटा । धनकुटाको भेडेटारमा आजबाट १२ औं फुड फेस्टिभल अर्थात् खाना महोत्सव सुरु भएको छ । कोशी प्रदेशका पर्यटन, वन तथा वातावरण मन्त्री सदानन्द मण्डलले उद्‌घाटन गरेसँगै महोत्सव सुरु भएको हो ।

उद्‌घाटन समारोहमा बोल्दै मन्त्री मण्डलले प्रदेश सरकारले पर्यटन वर्ष २०८२ को तयारी गरिरहेको बताए । पर्यटन क्षेत्रमा प्रदेश सरकारले विषेश प्राथमिकता दिएर काम गरिरहेको मन्त्री मण्डलको भनाइ थियो । ‘पर्यटकीय क्षेत्रमा लगानी बढाउन प्रदेश सरकारले कुनै पनि कसर बाँकी राख्दैन’, उनले भने, ‘हामी विशेष प्राथमिकता दिएर अगाडि बढिरहेका छौँ ।’

कोशी प्रदेशका पूर्वमन्त्री तथा सांसद निरन राई, धरान उपमहानगरपालिका उपमेयर अईन्द्र विक्रम बेघा, साँगुरीगढी गाउँपालिका अध्यक्ष जितेन्द्र रुम्दाली राई, उद्योग वाणिज्य संघ धनकुटाका अध्यक्ष विजयसन्तोषी राई र धनकुटाका प्रमुख जिल्ला अधिकारी टुवराज पोख्रेल लगायतले शुभकामना मन्तव्य राखेका थिए ।

होटल एशोसियसन भेडेटारको आयोजनामा सुरु भएको महोत्सव पुस १८ गतेसम्म सञ्चालन हुनेछ । कोशी प्रदेशको पूर्वी पहाडी जिल्लामा पर्ने भेडेटार मुख्य पर्यटकीय स्थल हो । यहाँ नेपालका विभिन्न जिल्लासहित छिमेकी देश भारतबाट पर्यटकहरू आउने गरेका छन् ।

प्राकृतिक रूपमा सुन्दर भेडेटार मौसमका कारणले पनि आन्तरिक तथा बाह्य पर्यटकको रोजाइमा पर्ने गरेको छ । भेडेटारसहित धनकुटाका सातवटै पालिकाको पर्यटन प्रवर्द्धनमा थप टेवा पुर्याउने उद्देश्यले फेस्टिभल आयोजना गरिएको आयोजक होटल एशोसिएसन भेडेटारका अध्यक्ष तुलराज लिम्बूले जानकारी दिए ।

फेस्टिभलमा २५ वटा स्टल राखिएको छ । स्थानीय जातीय खानाका परिकार, अर्गानिक तरकारी तथा फलफूल, हस्तकला, कृषि तथा घरेलु सामग्री बिक्री तथा प्रदर्शनीमा राखिएको छ । फेस्टिभलमा स्थानीय तथा राष्ट्रिय कलाकारहरूको प्रस्तुती समेत रहने आयोजकले जनाएको छ ।

तीन दिनसम्म चल्ने फेस्टिभलमा करिब ५० हजार बढी आन्तरिक तथा बाह्य पर्यटक भित्र्याउने लक्ष्य राखिएको छ । जसमा २ करोड बराबरको आर्थिक कारोबार हुने आयोजकको अनुमान छ ।

फेस्टिभलमा आउने आन्तरिक तथा बाह्य पर्यटकलाई विभिन्न पर्यटकीय स्थलको समेत भ्रमण गराउने आयोजकले जनाएको छ । सोही अवसरमा पर्यटकीय स्थलहरूको प्रचार-प्रसारमा सहयोग पुर्याएको भन्दै पत्रकारद्वय विनोद घिमिरे र गोविन्द बस्नेतलाई नगदसहित सम्मान गरिएको छ ।